மாறும் திருடர்கள்

கவிஞர் பெரியசாமி தூரனின்  "அழகு தெய்வ மாக வந்து" காவடிச்சிந்து மெட்டு

கூட்டங் கூடி கோஷம் போட்டுக்

    குலவி நாளும் வேஷம் போட்டுக்

கூத்தடித்து வாழ்வோர் பலருண்டு - நெல்லின்

கூடவே வளர்ந்தவிஷத் தண்டு ! - வாழ்வில்

    குணமி லாதவர் மனமி லாதவர்

    குறியி லாதவர் நெறியி லாதவர்

கூட்டமாய் இருக்குமிடம் கண்டு - வந்து

குட்டையைக் குழப்புவதும் உண்டு!

வேட்டி மீது கரைகள் கொண்டு!

    வெற்று போக்கில் நாட்கள் கொண்டு

வேதனை அளிப்பவர்கள் கோடி -உண்மை

வெல்வதைத் தடுப்பவர்கள் பேடி - வெறும்

    வெறியி லோடுவர் குறையி லாடுவர்

    வெறுமை பாடுவர் பழியி லூடுவர்

வேறுவேறு பொய்கள் சொல்லியாடி - என்றும்

வேற்றுமை வளர்ப்பார்விழி மூடி!

உண்மை தன்னை மண்ணில் விட்டுப்

    பொய்மைப் பேச்சை மட்டுந் தொட்டு

உண்மைபோல் உரைப்பார்களை நம்பி - இந்த

உலகம்போகும் தலைவாவென எம்பி - அவர்

    உள்ள மெங்கிலும் கள்ள வஞ்சனை

    நெஞ்ச மன்றினில் நஞ்சு சிந்தனை

உன்னதம்போல் பேச்சளப்பார் தம்பி - நம்பி

ஊமையானால் நெஞ்சம்படும் வெம்பி!

மண்ண கத்தைத் தின்று தீர்த்து

    விண்ண கத்தைத் தின்னப் பார்த்து

மனதினுக்குள் வைப்பார் பேராசை - சுற்றி

மதியிலாதோர் கோஷமிடும் ஓசை - நாட்டின்

    மங்க லங்களை நிந்தை செய்பவர்

    பொங்கும் வன்முறை தங்க வைப்பவர்

மாறிமாறித் திருடவருவார் காசை - ஊழல்

மக்கள்முன் விதைப்பாரந்த மாசை!!

#கைகளிலே_தனுவுண்டு

-விவேக்பாரதி 

23.02.2019