சதி நடனம்
தரிகிட தரிகிட இசையோடே
சடுதியில் ஆடுகிறாள் - சதி
சந்தச் சிலம்பொலி போடுகிறாள்!
உலகுகள் அதற்கேங்கும் - பல
ஊழிகள் அவள்நடம் தனைத்தாங்கும்
உயிர்களும் அதில்வாழும் - ஓம்
ஓமெனும் சுருதியும் அதிலோங்கும்!
வானொரு மேடையென - நிலம்
வாரிதி யாவையும் ஆடையென
வாழ்வெனும் மணிசிதறத் - தாய்
வடிவுடன் எழில்நட மாடுகிறாள்
ஞானமெனும் விழியால் - அவள்
நிர்த்தனம் நோக்கிட நோக்கிடவோ
நானவள் அவள்நானாய்ப் - பல
நாட்களின் நாடகம் போடுகிறாள்!
மல்லிகை விண்மீன்கள் - அவள்
மடியினில் குலுங்கிடும் பொன்மணிகள்
மனதினில் அவளாட்டம் - புதிர்
மருமம் கிளப்பிடும் ஆர்ப்பாட்டம்
சொல்லினில் அவள்சந்தம் - கவி
சொக்கி ஜதிசொல்ல அவள்நடனம்
சூரியன் ஒருநயனம் - பொழி
சுடர்விடு மதியொளி மறுநயனம்
சிவனொரு பாகத்தில் - நுதல்
சிவந்திடும் குங்கும வேகத்தில்
சிகையொரு தீக்கோலம் - பொறி
சீறிடும் இருவிழி வாட்கோலம்
தவமொரு வழிகண்டீர் - எழில்
தாய்நடம் கண்டிடத் தவம்புரிவீர்
தமிழ்க்கவி பாடிடுவீர் - அவள்
தகதக தகவென முன்வருவாள்!
அம்பிகை ஆடுகிறாள் - சிவ
ஹரசிவ ஓமெனப் பாடுகிறாள்
அன்பர்கள் ஆடுகிறார் - அவள்
ஆட்டுவித்தால் எவர் ஆடுகிலார்?
நம்புதல் வழியாகும் - பின்
நாள்தொறும் தோன்றிடும் அவள்நடனம்
நாம்வினை அவள்கர்த்தா - இதை
ஞானமென் றரைவதும் சரியாமே!!
-விவேக்பாரதி
31.08.2018