உடனே விழி தமிழா
பைந்தமிழ்ச் சோலை கவியரங்கம்
-மாங்காடு, சென்னை-
காப்பு
மஞ்சள் உருப்பிடித்த மாதா வினைகாக்க
நெஞ்சம் நிமிர்த்திய நேர்முகனே - அஞ்சேல்
எனச்சொல்லி இந்த எளியேனைக் காப்பாய்
உனைச்சொல்லில் வைத்தேன் உயர்த்து!
தலைவர் வாழ்த்து - கவிஞர் கவினப்பன்
பேராசான் தந்த பெருமை மிகுமவையில்
பேராசை யாலேநான் பேசவந்தேன்! - ஊராசி
பெற்றுயர்ந்த மாவரதன் பெற்றியெலாம் பாடிடக்
கற்றுயர்ந்தோர் செய்வார் கவி!
அரங்கத் தலைவர் அழகுத் தமிழைத்
தரங்கமென வீசுகின்ற தங்கம் - மறந்தநம்
சங்கத் தமிழெடுத்துச் சாற்றுவார் பாட்டுத்தார்!
சிங்கக் கவினப்பன் தீ!
உடனே விழி தமிழா
உடனே விழி தமிழா - என்ன
உறக்கம் இது புதிதாய்?
தமிழா என் தமிழா - உன்
தரங்களை எல்லாம் தடுத்திடு வோரால்
அமிழ்த்தப் படுகின்றாய் - உனது
ஆற்றல் பெருமலை பேர்க்கும் அதிசயம்
குமைந்திவை அறியாமல் - நீ
குணிந்தவ னாகி அடிபல வாங்கி
நிமிர்தல் மறக்கின்றாய் - உன்
நினைவை எழுப்பிட கனலைப் பதிக்கிறேன்!
தேசத்துச் சிந்தனையே - அற்று
தெளிவை மறந்தொரு பழியின் நிலையினில்
மாசுற்று வீழுவதா? - பல
வளங்கள் படைத்தநம் செழுமை நிலத்தினைத்
தூசுக்குள் தள்ளுவதா? - வெறும்
தோற்றப் புகழ்ச்சியில் நாட்டம் மிகக்கொண்டு
ஆசையில் வாடுவதா? - நீ
அறிவை வளர்த்திடக் கனலைப் பதிக்கிறேன்!
விளம்பரம் நம்பிநம்பி - மதி
விலையில் சறுக்கிட வாழும் நிலையிருள்
உளத்தில் பிரிவினைகள் - மிக
உயர்வாய் வளர்வது கொடுந்துயர் பேயிருள்
களத்தை மறந்துவிட்டு - பெருங்
கணினிகள் செய்யும் கணக்கும் இருளதில்
விளக்கின் ஒளிகண்டுநீ - இரு
விழி திறக்கப் புதுக் கனலைப் பதிக்கிறேன்!
உன்விழிப்பே உதயம் - இறை
உனக்குள் இருந்துபல் கணக்கை நிகழ்த்திடும்
உன்னதப் பேரிதயம் - அதன்
உச்சி பிடித்துநீ கச்சித மாகவே
மின்னல் படைத்துவிடு - செயும்
வினையும் கவனமும் சூல்கொண்ட கார்முகில்
இன்னும் உறக்கமென்ன - தோள்
இமயம் நிகர்த்திடக் கனலைப் பதிக்கிறேன்!
சாதியை நீக்கிடடா - தமிழ்ச்
சமுகம் பழையது மிகவும் பெரியது
நீதியைக் கொண்டதடா - அதை
நீசர் வெறுக்கிறார் நீவந்து காத்திடு
ஆதியும் நம்மொழியே - சுவை
அமிழ்தக் கலசங்கள் தமிழக் கவிதைகள்
வீதியெல் லாமுழங்கு - புது
வீச்சுடன் நீவரக் கனலைப் பதிக்கிறேன்!
தெய்வத்தில் நம்பிக்கையும் - அது
தெரிவது நாம்செயும் கடமையி லென்கிற
உய்வித்தையும் அறிந்தே - பலர்
உயர்ந்திட உயர்த்திட துள்ளி நடந்திடு
கைவைத்த இடமமிர்தம் - உன்
கரங்களை போலொரு தெய்வமில்லை மதி
மெய்வித்தில் ஆழ்ந்திடட்டும் - விதை
மேல்வைத்த தீயினில் வாழ்ந்து செழிக்கட்டும்
உடனே விழி தமிழா! - என்ன
உறக்கம் இது சரியா?
-விவேக்பாரதி
23.09.2018
