சதுரங்க வாழ்க்கை

காலமாம் வெளியினில் கருப்புடன் வெள்ளையாய்

    கட்டங்கள் நிற்குதம்மா - அந்தக் 

கதையிலென் பாத்திரம் ஏதென்று தெரியாமல் 

    கணக்குகள் விக்குதம்மா!

பாலனாய்க் குமரனாய் மனிதனாய்க் கவிஞனாய்ப் 

    பலவேடம் போடுகின்றேன் - எனில்

பாடங்கள் சொல்கின்ற விளையாட்டில் என்னுடைய

    பணியென்ன தெரியவில்லை! 

ஓரடி நகர்கின்ற சிப்பாயும் ராஜாவும் 

    ஒன்றெனத் தோன்றுகிறார் - எனில் 

ஒருவரைக் காத்திட இன்னொருவர் போராடி

    உழைத்தாலும் வீழுகின்றார்

நேரடி நகர்கின்ற யானையின் பாய்ச்சல்போல்

    நிறையபேர் தோன்றுகின்றார் - அவர் 

நேரான பார்வையை மட்டுமே கொள்கிறார்

    நெளிவுசுழிவில் தோற்கிறார்

மும்மூன்று கட்டத்தில் வளைகின்ற குதிரைபோல்

    முயற்சியில் மாற்றிமாற்றி - சிலர் 

முன்வைத்த கால்போல பின்வைக்கவும் செய்து 

    மயக்கிக் குழப்புகின்றார்

தம்பாதை தம்போக்கு மந்திரி போல்சிலர்

    தரையினில் வாழுகின்றார் - அவர்

தம்பட்டம் செய்தாலும் சரியாக உதவாமல் 

    தண்டமாய் வீழுகின்றார்

எப்பக்கம் பார்ப்பினும் ராணியின் ராஜ்ஜியம் 

    எதிர்ப்பவர் நிலை பூஜ்ஜியம் - ஆக 

எவராய் இருப்பினும் ராணியை வீழ்த்தவே

    இயக்கம் தொடக்குகின்றார் 

உட்பக்கம் வெளிப்பக்கம் பகைசூழ்ந்த விளையாட்டில்

    எப்பக்கம் நான் சேர்வதோ? - இந்த 

உலகத்து சதுரங்க ஆட்டத்தில் எதிலென்றன் 

    உண்மையை நான் காண்பதோ??

-விவேக்பாரதி

27 ஜூலை 2022